Uncategorized

Za čas prózdnin čaka w muzeju  tu a tam Lucky Lutk na našich młodych wopytowarjow. Skići krótke informacije, ma prašenja a nadawki. Tak ma so w galeriji tworjaceho wuměłstwa wěsty wobraz mjez druhimi namakać. Hdyž so wšitke nadawki spjelnja, čaka na Was małka překwapjenka.

Štwórtk, dnja 6.7.2017 wotmě so prózdninski poskitk „Dyrdomdejske wjedźenje po měsće“. Naša bobrija je na wšelakich stacijach hódančka rozrisała a so wšelakim wužadanjam stajiła: dźěći třělachu kaž hober Sprjewnik, zapłaćichu při Młynskich wrotach „cło“ a twarjachu symboliski rěbl za Karaseka.

Tučasnje pokazuje so hóstna wustajeńca Serbskeho muzeja w Zapadnokašubskim muzeju w pólskim Bytowje z titulom „Serbja. Mały Lud. Bohata kultura. Die Sorben. Kleines Volk. Reiche Kultur.“ Předstajeja so serbske stawizny a moderna, kaž tradicije a drasty. Kooperaciski projekt mjez serbskim a kašubskim muzejom započinaše so hižo 2014 z wosebitej wustajeńcu ke Kašubam w Serbskim muzeju. Wot wotewrjenja wustajeńcy pjatk, dnja 16.6.2017 hač do kónca, njedźelu, dnja 15.10.2017 informuje ekspozicija wo dwurěčnej Hornjej  a Delnjej Łužicy. Tohorunja zajimawa je zapřijata pućowaca wustajeńca „Prjedy hač woteńdźeš – Bevor Du gehst“ z fotogafijemi Maćija Bulanka.

Za lětuše lěćne prózdniny ma Serbski muzej štyri programy na poskitku. Dźěći móža so na dyrdomdejskim wjedźenju po měsće wobdźělić abo na kreatiwnej dźěłarničce prózdninske dopomnjenki zhotowić. Dale poskićuje so kostimowa bajkaca hodźinka a program k wosebitej wustajeńcy „Zbóžny, štóž wěri“. Tam wupytaja sebi zajimcy bibliske hrónčko a k tomu rjanu paslenku zhotowja. Wězo móža dźěći tež nowu hru wuspytać.

Tuž wjeselimy so na prózdninski čas a na Waš wopyt!

Zarjadowanska brošura: -> link.

Nadrobniše informacije k poskitkam: …

1. „Zbóžny, štóž wěri“

Hdźe chowaja so bibliske hrónčka we wšědnej rěči? W ramiku reformaciskeje wustajeńcy zeznaja dźěći wobrazliwu rěč biblije, wupytaja sebi bibliski citat a jón kreatiwnje přesadźa. Nimo toho hraje so nowa zabawna hra ke kóstkowanju.

Čas : ca. 1,5 h                                           materialowe wudawki: 1€

terminy: 29.06.2017, 14.07.2017, 27.07.2017, přeco w 10 hodź.

2. Dyrdomdejske wjedźenje po měsće

Zeznaj město Budyšin na druhe wašnje! Wuhotowany z potajnej kartu, dyrbiš puće pytać, nadawki spjelnić a prašenja wotmołwić. Štó namaka tajny pokład?

čas: ca. 1,5 h                                            přeco w 10 hodź.

terminy: 06.07.2017, 25.07.2017, 02.08.2017

     3. Kostimowa bajkaca hodźinka

Chcemy někotre krótke serbske bajki a stawiznički nic jenož słyšeć, ale tež sobu wuhotować a hrać. Za to móže sebi kóžde dźěćo swójski kostim sobupřinjesć. Tak wulećimy sebi do raja sonow a bajkow!

čas: ca. 1 h                                                terminy: 27.06.2017, 12.07.2017, 19.07.2017

serbsce: 9.45 hodź.

němsce : 11 hodź.

    4. Kreatiwna dźěłarnička

Pisać, torhać, wutřihać abo sfałdować, lěpić a wumolować. Hač swójska ideja abo něšto přihotowane, wšitcy su witani tu w muzeju so wuspytać a něšto kreatiwneho zhotowić. Paslenki a molowanki móžeš sebi potom wězo sobu domoj wzać!

 čas: ca. 1 – 1,5 h                                      materialowe wudawki : 1€

terminy: 04.07.2017, 21.07.2017, přeco w 10 hodź.

Prosymy wo přizjewjenje: 03591/2708700, sekretariat@sorbisches-museum.de

Budyski hród je někak 540 km wot pólskeho Bytówa, w kotrymž nańdźeš Muzeum Zachodniokaszubskie [Zapadnokašubski muzej] zdaleny. Dnja, 13.6.2017 poda so dźěl našich kolegow z hóstnej wustajeńcu wo Serbach na tutón puć. W Bytówje ma so pjatk, dnja 16.6.2017 wustajeńca „Serbja.Mały lud. Bohata kultura. – Die Sorben. Kleines Volk. Reiche Kultur.“ wotewrić.

Do toho běše wot oktobra 2014 hač do februara 2015 pola nas w Budyšinje wustajeńca „Kašubojo. Ludowa skupina w Pólskej. Něhdy a dźensa“ widźeć, kotraž předstaješe narodnu mjeńšinu Kašubow ze sewjerneje Pólskeje. Za to so lětsa w kašubskim regionje Pólskeje žiwa kultura Serbow pokazuje. Přidatnje wustaji so fotografiske dźěło Maćija Bulanka „Prjedy hač woteńdźeš“. Jedna so tu wo portrety serbskich žonow, kotrež tehdy hišće wšědnje w serbskej drasće chodźachu.

Wustajeńca je wotewrjena hač do 15.10.2017.

Přednošk dr. knjeza Buliša

„Trotz Warichius und Wendenpapst. Die verblassenden Bilder des sorbischen Göda“
wotměje so srjedu, dnja 10.5.2017 w 19.00 hodź. a nic srjedu, dnja 3.5.2017!

Wotpowědnje přesuny so termin zjawneho kuratorskeho wodźenja po wosebitej wustajeńcy tohorunja na srjedu, dnja 10.5.2017 w 18.00 hodź.

Dalši poskitk na tutym dnju poskićimy w 15.00 hodź.
Wšě zajimcy su wutrobnje witani na „Kofej w třoch“, tutón raz pod hesłom „Daj Bóh zbožo“ na temu nabožnych předmjetow w zběrce.

Naročne a estetisce wuhotowane wosebite wustajeńcy kulturno-stawizniskeho razu njejsu runjewon prěnja městnosć, na kotrejž wočakuješ sej lěhanski róžk ze zawkami. Ćim mjenje ličiš z tym, zo poskići so Ći k tomu přidatnje deskowa hra. Ale runje to smědźa naši młodźi wopytowarjo wustajeńcy „Pjeć lětstotkow. Serbja a reformacija“ dožiwić.

W najwjetšim rumje wustajeńcy je so jedyn róžk jako lěhanska přestreń wuhotowała.

Hra je natwarjena jako moraliska jězba. Je to deskowa hra ze zaměrom, swoju figurku jako přenju do cila přinjesć. Při tym hraja 20 akcijonowe pola wulku rolu, přez kotrež směš pak dale doprědka postupić pak dyrbiš někotre pola wróćo stupić. Tute akcijonowe pola wotpowěduja dobrym abo negatiwnym skutkam. Někotre čitaš z posměwkom, na přikład „Pomhaš swojimaj staršimaj w kuchni. Dźi 3 pola dale!“ (Nó, to so wudani!)

Wažne ideje a zakłady za koncepciju přinošowachu šulerjo 7. a 8. lětnika Ewangelskeje wyšeje šule w Bukecach pod nawodom knjeza Neumanna a knjeza Kühndela.
Realizaciju přewjedźeštej knjeni Gewalt a knjeni Albrecht!
Wšem wobdźělowanym wutrobny dźak! Zahrajmy!

Na fotomaj widźiš naćiski Bukečanskich šulerjow a hotowu hru.

Za póstny čas a k jutram smy za našich wopytowarjow zaso wjacore programowe poskitki přihotowali.
18.3., 19.3., 25.3., 26.3.2017, 1.4.2017, 2.4.2017, 8.4.2017 a 9.4.2017 pokazuja ludowi wuměłcy debjenje jejkow w Serbskim muzeju wot 13.00 – 18.00 hodź. W samsnym času wobsteji móžnosć debjenje jejkow w ramiku jedneje dźěłarnički pod nawjedowanjom wuknyć, respektiwnje zwučować.  Dorosćeni płaća za wobdźělenje hromadźe ze zastupom 4,50, dźěći 3 €.

Wot Ćicheho pjatka hač do Jutrowneje póndźele wotměje so zjawne debjenje jejkow přez cyły wotewrjenski čas wot 10.00 – 18.00 hodź. Wosobiny a techniki jednotliwych ludowych wuměłcow namakaće na protyce našeje internetoweje strony: Hlejće prošu pod: https://clone.sorbisches-museum.de/kalender-4/ .
Sobotu, dnja 15.4.2017 skićimy Wam w 15.00 hodź. mjeztym tradicionalny jutrowny program. Lětsa wustupuje rejowanska skupina Smjerdźaca z přewodźenjom skupiny „Sprjewjan“.

Witajće k nam – wjeselimy so na Waš wopyt!

Hižo w poslednich lětach přewjedźachu so po cyłej Němskej wšelke přihoty za jubilejne lěto wozjewjenja Lutherowych tezow. Wittenbergska reformacija njebě jenička forma reformaciskich hibanjow, ale hladajo na wliwy a wuskutki za srjedźny němski region jara rozsudna.
Bože słowo w maćeršćinje – tute žadanje Martina Luthera bě wuchadźišćo za nastaće serbskeho pismowstwa a dalše duchowno-kulturne wuwiće Serbow.
                Wotewrjenje njedźelu, dnja 26. měrca 2017, w 15.00 hodź. na žurli Serbskeho muzeja.
Njedźelu, dnja 26. měrca 2017, w 15.00 hodź wotewri pola nas na žurli Serbskeho muzeja reformaciska wustajeńca. Serbski superintendent Jan Malink poda wobsahowy zawod do wustajeńcy. Komorny ansambl Serbskeho ludoweho ansambla přewodźuje zarjadowanje z kruchomaj „Hommage a Albinus Mollerus I a II“ wot Jana Pawła Nagela. Zastup na wotewrjenske zarjadowanje je darmotny.
Wustajeńca:
We wustajeńcy pokazamy wažne dokumenty reformaciskeje doby, mjez nimi tež wažne rěčne pomniki Serbstwa. Wustajeja so tež wuměłske a nabožne předmjety, kaž tež eksponaty, kotrež wotbłyšćuja wosadne žiwjenje něhdy abo pobožnosć jednotliwca. Titul wustajeńcy „Pjeć lětstotkow“ njepoćahuje so jenož na stawizniske wuchadźišćo, ale tohorunja na cyłu dobu serbskeho ewangelskeho žiwjenja hač do dźensnišeho dnja.
Za čas wustajeńcy poskićimy dwaj přednoškaj.
Srjedu, dnja 3. meje, w 19.00 hodź. přednošuje knjez dr. Jens Buliš němsce pod titulom „Trotz Warichius und Wendenpapst. Die verblassenden Bilder des sorbischen Göda.“
Ke kóncej wustajeńskeje doby přednošuje srjedu, 23. awgusta, w 19.00 hodź. potom knjeni dr. Lubina Malinkowa wo Ochranowskej wosadźe w zwisku ze Serbami: „Ochranow a Serbja – Herrnhut und die Sorben“.
Samo naš termin za „Kofej w třoch“ srjedu, dnja 10. meje 2017 poćahuje so na temu wustajeńcy. Knjeni Pawlikowa rozprawi wo nabožnych objektach w zběrce Serbskeho muzeja. Wšě zajimcy su namołwjeni, swójske nabožne předmjety sobupřinjesć.
K wustajeńcy je w Ludowym nakładnistwje Domowina kniha „Pjeć lětstotkow. Serbja a reformacija.“ wušła. Zjawna prezentacija budźe 28. měrca 2017, w 19.30 hodź. na Michałskej farje w Budyšinje.

Posledni króć přeprošuje Serbski muzej na wjedźenje z kuratorom Jürgenom Maćijom a zdobom na finisažu wosebiteje wustajeńcy “Wotmolowane”. Wuspěšna wustajeńca witaše z 11 zarjadowanjemi něhdźe 2300 wopytowarjow. Njedźelu, dnja 05.03.2017 w 15 hodź. skići so poslednja móžnosć, sebi přez 250 historiskich fotografijow wobhladać.

Někotre z najstaršich zwobraznjenjow serbskich wosobinow z 1850tych lět so pokazuja. Za wšitkich zajimcow je tež zběrka tutych wobrazow z dalšimi informacijemi jako kniha w Ludowym Nakładnistwje Domowina wujšła. Nimo zajimawych wobrazow pokaza wustajeńca historisku techniku a napodobnjeny historiski ateljej.