Dar z Texasa
Wot tutoho měsaca wobohaći wosebity dar z Texasa zběrku Serbskeho muzeja.
Jedna so wo model originalneho zwona „Wendish Bell”, kotryž hižo přez mnohe lěta na kampusu uniwersity „Concordia” w Texasu steji. Original, zhotowjeny wot lijernje Gruhl w Małym Wjelkowje, je so 1854 wot wupućowarjow z Łužicy do Serbina přinjesł. Zwón wisaše na wěži wot „The First Wendish Church” – Prěnjeje Serbskeje cyrkwje a pozdźišeje „St. Pauls Lutheran Church” w Serbinje. Po tym přepoda so na „Concordia College of Texas” w Austinje, dźensniša „Concordia University” w Texasu. Model pokaza na stawizny serbskich ewangelskich wupućowarjow 19. lětstotka a budźe so w stajnej wustajeńcy pokazać.
Darićelej, dr. Davidej Zersenej, kiž je Prezident Emeritus, Concordia University w Texasu – wutrobny dźak!
Nazymnik – Pisane zarjadowanja za nazymski čas!
W nazymniku přeprošuje Serbski muzej na tři zarjadowanja. W zwisku z přehladku „KRABAT. Muž. Mytos. Marka.“ wotměje so srjedu, dnja 15.11.17 we 18.00 hodź. wodźenje po wosebitej wustajeńcy. Na to sćěhuje němskorěčacy přednošk stawiznarja Martina Nowakowskeho w 19.00 hodź. pod titulom „Anzeige, Folter, Feuertod: Die Hexenverfolgung der Frühen Neuzeit in der Oberlausitz.“
Sobotu, dnja 18.11.17 so w muzeju kuzła! Dźěćace popołdnjo z Gerhardom Wroblom započina so 16.00 hodź. W 17.00 hodź. pokazamy serbski siluetowy trikowy film „Sedmy rapak“ z lěta 2011.
Kónc nowembra je zaso jónu čas na kofej, tuž přeprošuje restawrator Jan Bart na štwórty Kofej w třoch pod titulom „Drjewo, hlina, słoma – zdźerženje a spad wosebitosće łužiskeje architektoniskeje krajiny.“
Wjeselimy so na Waš wopyt!
