Serbski muzej dožiwić
Kubłanske a posrědkowanske poskitki na jedyn wid: Serbski muzej-brošurka. Poskitki za kubłanišća namakaće wot strony 3 do 18 a poskitki za dorosćenych wot strony 19 do 27.
poskitki za dorosćenych
Wjedźenje po stajnej wustajeńcy
Zajimawe stawizny a žiwa tradicija – to Was w Serbskim muzeju wočakuje.
Při wjedźenju zhoniće mnoho wo serbskej kulturje, wo našich stawiznach a wuwiću serbskeje rěče. Na třoch poschodach móžeće so dokładnje wo stawiznach, ludowej kulturje, narodnej drasće a tradicijach, literaturje a tworjacym wuměłstwje informować.
Wjedźenje traje někak 1 do 1,5 hodź. Potym wobsteji móžnosć, sej čerstwy kofej zesłodźeć dać.
Wjedźenje z přizjewjenjom pod 03591/2708700 abo ticket@sorbisches-museum.de.
Wjedźenje po wosebitej wustajeńcy
26.05.2024 – 27.10.2024
Twarski inženjer Eberhard Dučman.
Mjez łužiskej drjewowej architekturu a industrielnym twarjenjom
Němsko-serbski twarski inženjer Eberhard Dučman słuša k najwuznamnišim zastupjerjam industrielneho twarjenja a inženjerskotwarskeho wuměłstwa – nic jenož w architekturnym wuwiću w NDR, tak mjenowaneje wuchodneje moderny, ale tež w mjezynarodnym měritku. Wustajeńca je prěnja prezentacija jeho tworjenja a pokazuje w šěsć stacijach Dučmanowe projekty. Ekspozicija je zdobom wuraz připóznaća składnostnje 20. posmjertnin a 100. narodnin twarskeho inženjera, wysokošulskeho wučerja, slědźerja na polu twarstwa a hladarja pomnikow.
Wjedźenje z přizjewjenjom pod 03591/2708700 abo ticket@sorbisches-museum.de.
Popołdniše zarjadowanja
KOFEJ W TŘOCH
Kóžde štwórć lěta přeprošuje Serbski muzej srjedu w 15.00 hodź. wšěch zajimowanych na kofej. Po krótkim zabawjacym přednošku k temje, kiž so do počasa hodźi abo k wurjadnemu objektej z muzejoweho wobstatka móžeće při kofeju bjesadować a stare dopomnjenki wuměnić. Za wšěch je to dobra přiležnosć, najnowše nowinki z dźěła muzeja słyšeć a sej aktualnu wosebitu wustajeńcu wobhladać.
popłatk: 4,50 € inkl. kofej a tykanc
Wjedźenje za ludźi ze zbrašenjemi
Wjedźenje přewjedźe so we wubranych rumnosćach stajneje wustajeńcy kaž tež w šulskim kabineće. Na spočatku so stawizny Serbow, baje a rěč rozłoža. Wšelakorosć narodnych drastow a płatow so přez dótkanje dožiwi. Tež jutrowne nałožki hodźa so přez dótkanje předstajeć. W galerij wopisuja so někotre wobrazy z pomocu zynkow, a jeli je zajim, móže so tež na serbsku hudźbu słuchać.
Wjedźenje traje někak 1 do 1,5 hodź. Potym wobsteji móžnosć, sej čerstwy kofej zesłodźeć dać.
Wjedźenje z přizjewjenjom pod 03591/2708700 abo ticket@sorbisches-museum.de.
Wjedźenje za ludźi z demencu
W srjedźišću steja dopomnjenki z dźěćatstwa a młodosće. Po krótkim wobhladanju stajneje wustajeńcy pokročuje wjedźenje w šulskim kabineće, hdźež móža so narěčane objekty tež do ruki wzać. Zhromadne spěwanje znatych spěwow abo přednjesenje basnje su tohorunja dźěl programa. Dale hodźi so mała wuměłska dźěłarnička z molowanjom wobraza přizamknyć. Po dorěčenju móže wopyt při kofeju a tykancu wuklinčeć.
Wjedźenje z přizjewjenjom pod 03591/2708700 abo ticket@sorbisches-museum.de.
Debjenje jutrownych jejkow
W dojutrownym času hodźa so wjedźenja po wosebitej wustajeńcy »Jutry w Serbach« hromadźe z dźěłarničku debjenja jejkow knihować. Při tym so bosěrowanje a wóskowanje jejkow poskića. Nimo toho so kónc tydźenja tež zjawne dźěłarnički z wěcywustojnymi ludowymi wuměłcami wotměwaja. Wosebita dźěłarnička za nawuknjenje wužrawanja abo škrabanja so separatnje přewjedźe.
Wjedźenje z přizjewjenjom pod 03591/2708700 abo ticket@sorbisches-museum.de.
muzejowa pedagogika
Serbski muzej ma za wopytowarjow wšěch starobnych skupin zabawne programy a zajimawe projekty přihotowane.
K stawiznam Serbow
Podamy so na krótku stawiznisku jězbu wot zasydlenja našich prjedownikow hač do dźensnišeho časa. Rěčimy wo narodnej drasće, wěrje a nałožkach.
Přez jednotliwe eksponaty muzeja so pokaza, što serbski lud we wšelakich lětstotkach nazhoni.
Hodźi so za: pěstowarnje, zakładne šule, spěchowanske šule, wyše šule a gymnazij
Dźěćatstwo a šula něhdy
Chcemy so ze dźěćatstwom před něhdźe 150 lětami rozestajeć a zhonić, kak su dźěći žiwe byli, z čim su sej hrajkali a što běchu nadawki wšědneho dnja.
Dožiwimy přez serbsku drastu a wužiwanje sudobjow a hrajkow čas našich prawowkow a pradźědow. Předstajenje šulskeje wučby 19. a 20. lětstotka dožiwja dźěći aktiwnje w kabineće. Zaběramy so ze serbskej rěču a starym pismom. Z pjerom a čornidłom wuknjemy stare pismo pisać.
Hodźi so za: pěstowarnje, zakładne šule, spěchowanske šule, wyše šule a gymnazij
Na slědach serbskich bajow
Tutón program wjedźe najprjedy přez stajnu wustajeńcu, w kotrejž móža šulerjo schowane bajowe figury nadeńć. K tomu předstaja so jednotliwe baje abo bajki.
Potom smě kóždy swoju najlubšu figuru molować.
Hodźi so za: pěstowarnje, zakładne šule, spěchowanske šule, wyše šule a gymnazij
Što nam wobrazy powědaja
Wupytamy sej w galerij Serbskeho muzeja wuměłske twórby, kiž nas wosebje narěča. Ze zynkami a słowami wopisujemy a wotrysujemy wupytany wobraz.
Štó z was ma najlěpšu stawiznu k swojemu wobrazej?
Hodźi so za: pěstowarnje, zakładne šule, spěchowanske šule, wyše šule a gymnazij
Wodźenje po starym měsće
Zeznajće město Budyšin na druhe wašnje!
Na wšelakich stacijach stareho města zhoniće něšto k stawiznam a k tomu maja so nadawki spjelnić abo na prašenja wotmołwić.
Hodźi so za: zakładne šule, spěchowanske šule, wyše šule a gymnazij
Narodne hibanje a serbske wótčincy
Jako zazběh so předstaji, kak je k narodnemu hibanju 19. lětstotka dóšło. W prezentaciji a při swobodnym dźěle zbliža so šulerjam sławne wosobiny kaž Smoler, Hórnik, Ćišinski, Zejler, Kocor, Muka, Měrćink, Krawc, Grólmusec, Kilian, atd.
Eksponaty wótčincow, citaty, knihi a hudźba su runje tak wobstatk programa.
Hodźi so za: wyše šule a gymnazij
Milčenjo a słowjanski srjedźowěk
Daloko sahace stawizny wjedu nas do zažneho srjedźowěka – do časa zasydlenja Milčanow a Łužičanow. Kotre žiwjenske poměry knježachu, kak a čehodla twarjachu hrodźišća a što je k tomu wjedło, zo su Serbja dźensa narodna mjeńšina, su stołpy wjedźenja. Wobhladamy sej zawostanki našich słowjanskich prjedownikow a zamyslimy so z praktiskimi přikładami do tuteje časoweje doby.
Hodźi so za: zakładne šule, spěchowanske šule, wyše šule, gymnazij
Kak nastanje z lena płat
Štó dźensa hišće wě, z čeho płat nastanje, a štó móže słowa kaž wochla, kołwrót, přaza a tkanje rozkłasć? Někotre serbske bajki a baje nam wo tym rozprawjeja. Wobhladamy sej tež rostliny a zhonimy, kotry płat z nich nastanje. Na kołwróće móža dźěći spytać nitku přasć, a jako zakónčenje zhromadnje koło teptamy.
Hodźi so za: předšulske dźěći, zakładne šule, spěchowanske šule
Hola, pěsk a brunica
»Bóh Knjez je stworił Łužicu a čert je zarył brunicu«
Tute hrónčko je nam derje znate. Što so we Łužicy wšitko wudobyła a kak so krajina přez to změni zhoniće při tutym wjedźenju. Proces změnow w přirodźe a wosebje tež w towaršnosći so přez mólby, karty, wobrazy a spisy zwobraznja. W skupinskim dźěle so přikłady wudźěłaja a předstaja.
Hodźi so za: zakładnu šulu, spěchowansku šulu, wyšu šulu a gymnazij
wosebita wustajeńca
Twarski inženjer Eberhard Dučman.
Mjez łužiskej drjewowej architekturu a industrielnym twarjenjom
26.05.2024 – 27.10.2024
Němsko-serbski twarski inženjer Eberhard Dučman (1926 – 2005) słuša k najwuznamnišim zastupjerjam industrielneho twarjenja a inženjerskotwarskeho wuměłstwa – nic jenož w architekturnym wuwiću w NDR, tak mjenowaneje wuchodneje moderny, ale tež w mjezynarodnym měritku. Ekspozicija je zdobom wuraz připóznaća składnostnje 20. posmjertnin a 100. narodnin twarskeho inženjera, wysokošulskeho wučerja, slědźerja na polu twarstwa a hladarja pomnikow.
Pokazuja a rozłožuja so twarjenja a konstrukcije, při tym dawaja rysowanki, modele a fotografije dobry dohlad do dźěławosće Dučmana. Hač montwar abo pomnikoškit, mnohostronskosć skutkowanja so teoretisce a praktisce sposrědkuje.
“Město přichoda” a “Drjewjana wjeska” stej knihujomnej programaj a zwjazanej z kreatiwnej dźěłarničku. Nastate objekty a ideje wustajeja so k “Dnjej wotewrjeneho pomnika” (8.9.2024) w šulerskim kabineće.
Přizjewjenje pod: 03591/270 870 28, ticket@sorbisches-museum.de
Prózdninske poskitki
Wjeselimy so na waš wopyt! Hortowym skupinam doporučimy separatny termin. Prosymy wo přizjewjenje: ticket@sorbisches-museum.de abo 03591/ 270870-0.
Kuzłar KRABAT
W ramiku Krabatoweho tydźenja zaběramy so w nazymskich prózdninach ze serbskej bajowej postawu Krabata a historiskej wosobinu Janka Šajatovića. Wotměnjacy dźěćacy poskitk hodźi so derje za šulske dźěći. Při tym steja zeznaće powěsće wo Krabaće a kreatiwne paslenske poskitki w srjedźišću.
termin: 08.10.2024; čas: 14 do 16 hodź.
termin: 17.10.2024; čas: 10 do 12 hodź.
staroba: wot 6 lět
płaćizna: 5 €
KRABAT. Kuzłarske činki
Wosebity wjeršk programa je kuzłar, kotryž předstaja nam swoje kuzłarske činki! Kreatiwnje zaběramy so potym z powěsću wo Krabaće a historiskej wosobinu Janka Šajatovića. Wjeselće so na wotměnjacy dźěćacy poskitk.
termin: 10.10.2024
čas: 10 – 12 hodź.
staroba: wot 5 lět
płaćizna: 5 €
Krabat. Mjez mytosom a čłowjekom
W ramiku Krabatoweho tydźenja zaběramy so ze serbskej bajowej postawu Krabata a historiskej wosobinu Janka Šajatovića (1624 – 1704). Přeprošujemy wutrobnje do wustajeńcy a na wjedźenje, hdźež předstaja so mjez druhim regionalne a časowe zwiski.
termin: 08.10.2024; čas: 10 – 11.30 hodź.
termin: 10.10.2024; čas: 14 – 15.30 hodź.
płaćizna: 7 € na wosobu
pokiwy
Z organizatoriskich přičin prosymy wo přizjewjenje skupinow wot znajmjeńša 8 dźěći/šulerjow. Principielnje wusměri so tajki poskitk na čas wot 60 do 90 mjeńšinow. Tu móže pak so tež indiwidualnje dorěčeć. Za šulerjow z wokrjesa Budyšin je zastup darmotny. K tomu wobliča so kóšty za wotpowědny trěbny material a wjedźenje.
Při wobsahowych a organizatoriskich prašenjach k muzejopedagogiskim poskitkam wobroćće so na našu sobudźěłaćerku, knjeni Móniku Ošikowu, telefonisce pod čisłom 03591/270870-28 abo z mejlku pod m.oschika@sorbisches-museum.de.
Serbski muzej poruča spěchowanski program »KulturPfadfinder« 2023.
Naš poskitk lětsa je program „Powědaj raz… Erzähl‘ doch mal…“. Wopytajće muzej abo muzej wopytajće so!
Kulturny rum Hornja Łužica-Delnja Šleska poskića nowy spěchowanski program »KulturPfadfinder«. Wšitcy kubłanscy partnerojo a kulturni partnerojo we wokrjesomaj Budyšin a Zhorjelc móža so na nim wobdźělić. Poskitk měri so na dźěći a młodostnych na kraju, zo by so jim wobdźělenje na kulturnych aktiwitach zwonka šule, horta a pěstowarnje zmóžniło.
