Wuspěšne restawrowanje burskeje drohoćinki
Restawraciski projekt parawenta z Chrósćic ze spočatka 19. lětstotka ze zběrki stareho Serbskeho muzeja je dźěl přihotowanjow wustajeńcy „Čej‘ da sy?“, kiž ma so wot 14. meje 2023 w Serbskim muzeju pokazać. Drježdźanski restawrator Roland Flachmann je stare škody na pomolowanju, kiž nastachu něhdy přez mokrotu, kaž tež ramik wuporjedźał.
Nalěwo je widźeć arcyjandźel Michał, kiž zběha ke škitej mječ nad městom, kotrež ma napadnu podobnosć z Budyšinom, ma pak prawdźepodobnje njebjeski Jerusalem předstajić. Pódla su widźeć dalše sceny: tři křiže na horje Golgota, Mójzes přijimuje dźesać Božich kaznjow na horje Sinai a Abraham wopruje swojeho syna Izaaka. Symbolika wopora a wumóženja w tutych wobrazach pohnu zawěsće něhdy k pobožnej modlitwje při chorołožu. Tola bě to tež drohotna pycha we jstwě kublerja. Pomolowane sćěny wokoło łoža słušachu wokoło lěta 1800 skerje k mobiliarej zemjanow a bohatych měšćanow. Zo wužiwachu so tež pola burow je lědma znate. Dla płódneje role wokoło klóstra Marijina hwězda wobhladowachu so Horjanscy burja něhdy jako zamóžići.
Restawraciska naprawa bu sobu financowana z dawkowych srědkow na zakładźe hospodarskeho plana, wobzamknjeny wot Sakskeho krajneho sejma. Serbski muzej dźakuje so Krajnemu zarjadej muzejownistwa za podpěru.
Kofej w třoch, 28.09.2022 w 15 hodź.
Kofej w třoch: “Postrow z Budyšina” – pohladnicy jako wuměłskostawizniske žórła
Historiske pohladnicy su wažne wuměłskostawizniske žórła, kotrež so husto za chroniki a domiznowědne publikacije wužiwaja. Kónc 19. lětstotka wikowachu so tež dopisnicy z łužiskimi a serbskimi motiwami. Zarjadowanje wěnuje so tutym małym wuměłstwowym objektam a horliwosći zběraćelstwa. Zběrka dopisnicow Serbskeho muzeja wobchowa wosebje serbske motiwy. Přeprošujemy Was wutrobnje, Waše swójske pohladniske a drastowe dopisnicy sobu přinjesć.
přednošuje: Ilona Bierlingowa
płaćizna: 4,50 € inkl. kofej a tykanc
