26.5.2019 w 15 hodź. Wotewrjenje wosebiteje wustajeńcy
Njedźelu w 15 hodź. so wuměłska wustajeńca “WOBRAZY KRAJINY. PODOBE POKRAJINE. BILDER EINER LANDSCHAFT. WOBRAZE KRAJINY. – Přechod 03” zahaji. Nimo witanskich słowow Jana Budarja a Christiny Boguszoweje rěči dr. Eva-Maria Stange, Sakska statna ministerka za wědomosć a wuměłstwo, jako patronka trojo-krajneho projekta. Hudźbne wobrubjenje na wernisaži přewza Heidemarie Wiesnerec při klawěrje a Gerold Gnausch na saksofonje. Zastup je darmotny.
Pućowaca wustajeńca, kiž pokaza z mólbami, grafikami, plastikami a fotami změny a přechody krajiny a w kulturje, je hač do 25.8.2019 w Serbskim muzeju widźeć.
Mjezynarodny dźeń muzejow 19.5.2019
Pod hesłom
Muzej- přichod žiwych tradicijow
přeprošujemy njedźelu, dnja 19.5.2019, wot 10 do 18 hodź. do Serbskeho muzeja. W kabinetnej wustajeńcy pokazamy dźěła šulerjow Serbskeho gymnazija. W plastikach w formje ruki zwuraznichu šulerjo šulskeho lěta 2012/2013 ze samowolenymi motiwami wosobinski poćah k serbskemu narodej. Nimo toho so tež druhe dźěła šulerjow pokazaja. Zastup je darmotny.
