Prěnje zjawne předstajenje noweje koncepcije so wotměło
Na prěnim zjawnym předstajenju noweje wustajenskeje koncepcije za nowotwar Serbskeho muzeja wobdźěli so něhdźe 40 zajimcow w Serbskim domje. Jan Budar wot Załožby za serbski lud jako nošer projekta, dr. Ulrich Hermanns wot grafiskeje firmy Ausstellung Medien Transfer GmbH a Christina Boguszowa jako wjednica muzeja kaž tež dalši muzejownicy wopisachu prěnje ideje a dźěłowy staw. Nowa trajna wustajeńca njebudźe chronologiska, ale modularnje natwarjena. Temowe wobłuki zahaja so w přitomnosći, sahaja wróćo do zašłych lětstotkow a kónča zaso w přitomnosći. Namjet z publikuma, tež přichod zaplesć, muzejownicy rady přiwzaja. Wjele dobrych idejow a impulsow so na zjawnej diskusiji nahromadźi. Tež kritiske přispomnjena pomhaja dale koncepciju wuwić.
24.06.2024, 17 hodź.: Prezentacija planowanskeho stawa Serbskeho muzeja za nowu trajnu wustajeńcu
Załožba za serbski lud a Serbski muzej přeprošujetej wutrobnje wšitkich zajimcow, sej prěnje koncepcionelne ideje za nowu trajnu wustajeńcu Serbskeho muzeja w přichodnym „Serbskim forumje wědy na Lawskim arealu“ wobhladać. Předstaji so tuchwilny staw planowanja. Za koncepciju zamołwity wuhotowanski běrow Dr. Hermanns Ausstellung Medien Transfer GmbH zarjadowanje moderěruje. Dwě hłownej prašeni tworitej žro zarjadowanja: Kak rozdźěla so rumnosće a wustajenišća w nowotwarje a kotre inowacije na hosći noweho muzeja w přichodźe čakaja? Rady chcemy zajimcow do procesa wuwića zapřijeć a witamy swójske mysle a dodawki.
Zarjadowanje so tež přez livestream (Youtube-kanal Załožby) přenjese, direktny link namakaće sčasom na internetnej stronje stiftung.sorben.com.
termin: póndźelu, 24.06.2024 w 17 hodź. na žurli Serbskeho domu (Póstowe naměsto 2, Budyšin)
19.06.2024: Kofej w třoch “Lejpold”
“Lejpold. Korčma při serbskim highwayju ”
Hižo přez 200 lět steji při dróze mjez Chróšćicami a Delanami něhdyši hosćenc. Mjez domoródnymi jako “Lejpold” znaty, liči k poslednim hišće zdźeržanym tykowanym domam. Ludźo chodźachu tam na piwo, towarstwa so zetkawachu a samo křćeńcy a kwasy so tu swjećachu. Jako swójbny statok běše we wobsydstwje swójby Opicec, pozdźišo Brankačkec a Šenkec. Wo stawiznach a namakankach za starymi murjemi rěči Daniela Heckowa, rodźena Šenkec.
02.06.2024, 15 hodź.: Kuratorske wjedźenje a přednošk
Na kuratorske wjedźenje po wustajeńcy „Twarski inženjer Eberhard Dučman. Mjez łužiskej drjewowej architekturu a industrielnym twarjenjom“ přeprošuje Serbski muzej zhromadnje z dr. dr. Betinu Kaunowej njedźelu w 15 hodź. Přizamknje so přednošk.
16 hodź. přednošk “Žiwjenje w chěži ze stołom – konstrukcija, saněrowanje a aktualne wužiwanje ”
Chěža ze stołom je za našu kónčinu typiske wašnje twarjenja. Jeje twarskobiologiska kwalita ma so při wuporjedźenju přez wužiwanje tradicionalnych twaršćiznow zdźeržeć. Funkcionalne rumnostne rozrjadowanje domu do bydlenskeho wobłuka, chódby a hospodarskeho dźěla hodźi so tež dźensa jara derje wužiwać a wotpowěduje narokam našeho časa a indiwiduelnym potrjebam. Dźiwa-li so na energiju lutowace, pomnikoškitej wotpowědowace naprawy, ma tajki tradicionelny dom najlěpše wuhlady za přichod.
Referentka přednoška, diplomowa architektka Kerstin Richter z Weifa, je w swojej powołanskej karjerje mnohe chěže ze stołom přewodźowała, wot łahodneje reparatury hač k wobšěrnemu saněrowanju.
26.05.2024 w 15 hodź.: Wotewrjenje wustajeńcy z hudźbnym wobrubjenjom
„Twarski inženjer Eberhard Dučman
Mjez łužiskej drjewowej architekturu a industrielnym twarjenjom”
Němsko-serbski twarski inženjer Eberhard Dučman ( 1926 – 2005) słuša k najwuznamnišim zastupjerjam industrielneho twarjenja a inženjerskotwarskeho wuměłstwa – nic jenož w architekturnym wuwiću w NDR, tak mjenowaneje wuchodneje moderny, ale tež w mjezynarodnym měritku. Wustajeńca je prěnja prezentacija jeho tworjenja a pokazuje w šěsć stacijach Dučmanowe projekty. Ekspozicija je zdobom wuraz připóznaća składnostnje 20. posmjertnin a 100. narodnin twarskeho inženjera, wysokošulskeho wučerja, slědźerja na polu twarstwa a hladarja pomnikow.
Přewodny program k wustajeńcy je mnohostronski. K wustajeńcy je w nakładnistwje LND kniha ze samsnym titulom wušła kiž je w muzeju na předań.
Kedźbu: Parkowanje na Hrodźe njeje móžne.
19.04.2024: Mjezynarodny dźeń muzejow
Pod hesłom “Muzeje z wjeselom wotkryć” móže so Serbski muzej njedźelu darmo wopytać.
Trajna wustajeńca k stawiznam, kulturje a rěči skića mnoho wotměny. W 15 hodź. poskićujemy wjedźenje. Dale so wšelake pućowace wustajeńcy muzeja skrótka předstajeja.
27.04.2024, 16 hodź.: Kuratorske wjedźenje “Jutry w Serbach & Kóstku dać”
Na kuratorske wjedźenje po wustajeńcy “Jutry w Serbach & Kósktu dać” přeprošuje Serbski muzej zhromadnje z wuměłču Karoline Schneider, sobotu, 27. apryla w 16 hodź. Wustajeńca wěnuje so nałožkam a tradicijam Serbow wot zeleneho štwórtka hač k jutrońčce. Wosebitu kedźbnosć zasłuža sej dobyćerske kolekcije kóždolětneho wubědźowanja wo najrjeńše serbske jutrowne jejko. Nimo toho spomina so na serbskeho spisowaćela Bena Budarja z inscenaciju “Na křižerjach” Němsko-Serbskeho ludoweho dźiwadła Budyšin. Pod hesłom “kóstku dać” zaběra so wuměłča Karoline Schneider z wuznamom kawrijowych šlinkow za serbsku křižersku tradiciju a za kultury po wšěm swěće. Jeje wuměłske rozestajenje z tutej křižerskej debu a jeje symboliku zwjazuje wuměłča z feministiskimi refleksijemi.
06.04.2024: Wužrawanje jutrownych jejkow wuspytali
Słona kisalina na barbnych jejkach abo radšo po tradicionelnym wašnju juška kisykała na z cyblu barbjenych jejkach? – Woboje wuspyta 14 wobdźělnikow dźěłarnički zašłu sobotu 6. apryla popołdnju pod fachowym nawodom Edeltraut Gründel a Heleny Pallmannoweje w Budyskim Serbskim muzeju.
Wosebje za małe dźěći je warianta z jušku kisykała bjezstrašna a zajimawa alternatiwa. W dwěmaj skupinomaj daštej wjackrótnej dobyćerce wubědźowanja wo najrjeńše serbske jutrowne jejko swoje nazhonjenja dale. Edeltraut Gründel z Wojerec pochadźa ze serbskeje swójby, w kotrejž so přez generacije tuta přeco hižo rědka serbska technika nałožuje. Helena Pallmannowa bě so wosebje z wožiwjenjom stareje warianty po přirodnym wašnju zaběrała. Spěchowanske towarstwo Serbskeho muzeja je tutu wurjadnu dźěłarničku zarjadowało, zo by na wohroženu techniku skedźbniło.
Jutrowny program Serbskeho muzeja
17.03.2024 – 05.05.2024, 10-18 hodź.: Jutry w Serbach. Kóstku dać.
Lětuša jutrowna wustajeńca Serbskeho muzeja wěnuje so zaso nałožkam a tradicijam Serbow wot zeleneho štwórtka hač k jutrońčce. Wosebje wabja dobyćerske kolekcije kóždolětneho wubědźowanja wo najrjeńše serbske jutrowne jejko. Nimo toho spominamy na serbskeho spisowaćela Bena Budarja z inscenaciju “Na křižerjach” Němsko-Serbskeho ludoweho dźiwadła Budyšin. Pod hesłom “kóstku dać” zaběra so wuměłča Karoline Schneider z wuznamom kawrijowych šlinkow za serbsku křižersku tradiciju a za kultury po wšěm swěće. Wězo mamy tež za dźěći jutrownu zaběru přihotowanu.
29.03.2024 – 01.04.2024, 10-18 hodź.: Jutrowne wiki w Serbskim muzeju
Wot wulkeho pjatka hač do jutrowneje póndźele pokazuja ludowi wuměłcy na jutrownych wikach Serbskeho muzeja wšelake móžnosće debjenja serbskich jutrownych jejkow. W tradicionalnych technikach bosěrowanja, wóskowanja, wužrawanja a škrabanja móža so debjene jejka tež kupić.
30.03.2024, 15 hodź.: Serbska folklora na žurli
Sobotu, 30. měrca wotměje so w 15 hodź. kulturny program na žurli muzeja ze Serbskej rejwanskej skupinu Smjerdźaca z.t. Tuta zwuraznja ze serbskej rejwanskej folkloru, hudźbu a spěwami typiske nałožki a tradicije.
Tež jutrownu póndźelu je Serbski muzej wot 10 do 18 hodź. wotewrjeny!
27.03.2024, 15 hodź.: Kofej w třoch “HERCY“
Kónc 1960-tych lět zdobychu Beatles a Rolling Stones swět, w Pólskej znaješe kóždy beatband Czerwone gitary. Tež we Łužicy chcychu młodźi Serbja beatowu hudźbu činić a załožichu skupinu HERCY. K swojej hudźbje a wo swojich wosobinskich dopomnjenkach na tehdyši čas rozprawjeja čłonojo skupiny.
Zarjadowanje poćahuje so na předstajenje Němsko-Serbskeho ludoweho dźiwadła „Na tamnym boku měsačka” Lubiny Hajduk-Veljkovićoweje, kotryž je hišće hač do 6. apryla 2024 na hłownym jewišću dźiwadła widźeć.
Serbski muzej spěchuje so přez Załožbu za serbski lud, kotraž dóstawa lětnje přiražki z dawkowych srědkow na zakładźe hospodarskich planow, wobzamknjenych wot zapósłancow Zwjazkoweho sejma, Krajneho sejma Braniborskeje a Sakskeho krajneho sejma, kaž tež přez wokrjes Budyšin a Kulturny rum Hornja Łužica-Delnja Šleska. Serbski muzej je zarjadnišćo wokrjesa Budyšin.
