Uncategorized

Hižo před něšto časom započa so předźěłany grafiski koncept muzeja přesadźić. Tak so logo na wuchodnu fasadu namolowa, zo bychu so wopytowarjo ze směra Maćijoweje wěže lěpje orientować móhli. Tež nowe pismiki při zachodźe buchu zašły tydźeń připrawjene. Nimo tutych nowostkow dóstanu wopytowarjo hižo wot januara při kasy nowe zastupne lisćiki. Tež darowanje dobropisow jako karta je nětko móžne.

Njedźelu, wot 10 do 18 hodź., so přebywanje w muzeju dwójce wudani! Wšako móže so wopyt wosebiteje wustajeńcy “Jutry w Serbach” nachwatać a nimo toho je zastup bjezpłatny. Wjeselimy so na WAS!

Wot 5. meje 2020 wočini Serbski muzej zaso swoje durje za zjawnosć. Za to su přidatne naprawy za zdźerženje wotstawkowych rjadowanjow a hygieniskich předpisow trěbne. Prosymy wšěch wopytowarjow, tute pokiwy wobkedźbować.      Waš muzejowy team

Naprawy za wopytowarjow Serbskeho muzeja

1. Nošenje zakryća za hubu a nós w Serbskim muzeju je za dorosćenych a dźěći wot 6 lět po zakonskich předpisach winowatosć a a wuměnjenje za zastup
2. Prošu dźiwajće na woznamjenjene wotstawki a pokiwy w foyeru kaž tež we wustajenskich wobłukach
3. Dodźeršće powšitkowne hygieniske předpisy hygieniske naprawy wotpowědnje doporučenju Roberta Kochoweho instituta
4. Muzejowy personal rjaduje prudy wopytowarstwa, tak reguluja so wulkosće skupin a wopytowarske ličby w domje po zakonskich postajenjach
5. Doporučujemy płaćenje z kartku
6. Muzejowe wopyty z přizjewjenjom skrótšeja časy čakanja a zadźěwaja nastawacym wulkim skupinam
7. Naša muzejowa kofejownja wostanje přechodnje zawrjena
8. Z hygieniskich přičin wostanu interaktiwne medijowe stacije hasnjene
9. W muzejopedagogiskim kabineće su za dlěši přebytk blida a stólcy we wotpowědnym wotstawku spřihotowane
10. Wodźenja za swójby, kotrež su w jednej domjacnosći žiwe, su po dorěčenju móžne
11. Wobkedźbujće domowy porjad Serbskeho muzeja
12. Prošu informujće so wo aktualnej situaciji na homepage muzeja

Zastup jenož ze zakryćom huby a nosa móžny!

Tež hdyž so tučasnje žani hosćo w Serbskim muzeju witać njesmědźa, je dźěła dosć. Wobšěrna inwentura, dokumentacija a fachowske zapakowanje eksponatow su wažne přihoty za přenjesenje něhdźe 38.000 objektow do noweho składu na Lubijskej dróze w Budyšinje. Dale so krok po kroku wšitke wustajenske witriny wurjedźa. Tež na druhich polach so planuje a organizuje. Nowy wotběh wosebitych wustajeńcow a dalšich projektow ma so na noze stajić a z tym zwisowace financowanje zaručić. W tutych dnjach so šija škitne maski za personal a za hosći. W přichodźe chcemy tež wirtuelne předstajenje eksponatow a přinoškow zmóžnić.

Dźensa, 12. měrca 2020, přepoda Bert Nowak z Hamburga dwě rysowance w lěće 2009 zemrěteho wuměłca Dottore (Dr. Wolfgang Lehmnann) Serbskemu muzejej. Rysowance z lěta 1960 a 1961 předstajetej serbske motiwy a nastaštej za čas jeho skutkowanja jako lěkar w ambulancy w Njeswačidle. Hižo 2012 dari Bert Nowak ze zawostajeństwa Dottore rjad pjerokrjesbow a plastiku Serbskemu muzejej.

Serbski muzej je wot 18.3.2020 do 19.4.2020 za wopytowarjow zawrěny. Prosymy wo zrozumjenje, hdyž so dla tuchwilneho wohroženja přez corona-wirus zarjadowanja w Serbskim muzeju njewotměwaja. To potrěchi w prěnim rjedźe wosebitu wustajeńcu “Jutry w Serbach”. Wjedźenja, dźěłarnički, jutrowne wiki kaž tež jutrowny program su wotprajene. Dalše zarjadowanja kaž “Kofek w třoch”, koncerty a prezentacije hač do 19.4.2020 wupadnu. Jutrowna wustajeńca z twórbami Maria Ošiki z Worklec so hač do 17.5.2020 podlěši. Nowy termin wernisaže wosebiteje wustajeńcy „Barby daliny. Moler Ante Trstenjak a Łužiscy Serbja” so prawje bórze zdźěli.

slědowace zarjadowanja so njewotměwaja:

• 21.3.2020 zhromadźizna Maćicy Serbskeje, nowy termin so zdźěli
• 21.3.2020 Dźěłarnička debjenja jutrownych jejkow w technice bosěrowanja a wóskowanja
• 22.3.2020 Dźěłarnička debjenja jutrownych jejkow w technice bosěrowanja a wóskowanja
• 25.3.2020 Kofej w třoch „Mjedowy kołač a potajna woda“, referentka Andrea Pawlikowa
• 28.3.2020 Dźěłarnička debjenja jutrownych jejkow w technice bosěrowanja a wóskowanja
• 29.3.2020 Dźěłarnička debjenja jutrownych jejkow w technice bosěrowanja a wóskowanja
• 4.4.2020 Dźěłarnička bosěrowanje a wóskowanje jutrownych jejkow
• 5.4.2020 Dźěłarnička bosěrowanje a wóskowanje jutrownych jejkow
• 10.-13.4.2020 Jutrowny kónc tydźenja: Debjenje a wiki jutrownych jejkow z ludowymi wuměłcami
• 11.4.2020 Jutrowny program ze Serbskej rejowanskej skupinu Smjerdźaca z.t.  
• 18.4.2020 Dźěłarnička wužrawanja jutrownych jejkow z Edeltraud Gründel

Projektny žónski chór pod nawodom Walburgi Wałdźic předstaji program nowowobdźěłanych spěwow z brunicowych kónčin, ze Slepoho a z Delnjeje Łužicy. Pólska huslerka Izabela Kałduńska přewodźa wokalne zynki z huslemi mjez druhim tež z effektami.

Projekt so spěchuje přez MitmachFonds Sachsen.

Serbski muzej přeprošuje njedźelu, dnja 1.3.2020 na zakónčace zarjadowanje modoweje přehladki. W 15 hodź. poskići so wjedźenje w němskej rěči a w 15.30 hodź. přizamknje so serbskorěčne wjedźenje. Wjeršk finisaže je performance designerow „My smy moda“ w 17 hodź. Tu prezentuja modle drasty a kolekcije z wustajeńcy a du z nimi „do swěta“.

11.02.2020 a 20.02.2020; 10 – 11.30 hodź.

“Helaw-Alaaf-Ahoi! Póstniske nory witajće”

Zeznaj nałožki w póstniskim času a twor sej swójsku masku. Štóž chce, njech přińdźe w kostimje abo so w muzeju předrasći!

13.02.2020 a 18.02.2020; 10 – 12 hodź.

“SERBSKI STREET STYLE”

We wustajeńcy widźimy modu ze serbskimi elementami. Přizamknje so mała dźěłarnička, hdźež naćisnjemy a paslimy sami serbsku modernu drastu, figury a debjenki.

Prosymy wo přizjewjenje pod 03591/270 870 11.

17.30 hodź.

wjedźenje po wosebitej wustajeńcy SORBIAN STREET STYLE w serbskej rěči

18 hodź.

wjedźenje po wosebitej wustajeńcy SORBIAN STREET STYLE w němskej rěči

19 hodź.

film “The True Cost. Der Preis der Mode”, USA 2015, wo wuklukowanju přez modowu industriju