tura 4: Přez cyrkwinske a rěčne kupy

Sobotu, 16. septembra podamy so na našu poslednju něhdźe 50 km dołhu turu přez katolsku Łužicu. Zetkamy so w 10 hodź. w Smochćicach při kubłanišću biskopa Bena.  Wot tam podamy so na puć přez Haslow do Baćonja k tamnišej wosadnej cyrkwi “Jězusoweje wutroby”, kotraž bu wot katolskich Serbow mjez 1882 a 1887 natwarjena. Znowa přez Haslow jědźemy k Zarěčanskemu wětrnikej mjez Łuhom a Chasowom. Dale wjedźe nas puć do Radworja, wosadna wjes z třomi cyrkwjemi, kotraž je zdobom tež ródna wjes zbóžneho Alojsa Andrickeho. Nimo zhubjeneje wsy Hronow dojědźemy sej naposledk do Zdźěrje a wot tam jědźemy přez Delnju Hórku wróćo do Budyšina.

15 hodź.  “Wosebitostki ze zběrkow Serbskeho muzeja”, referentka: Rebecca Wöppelowa

Předstajeja so wosebite eksponaty a kuriozity ze zběrkow. Dale budźe něhdyši direktor Arnošt Kowar (1961 – 1980) składnostnje 100. posmjertnych narodnin počesćene.

16 hodź. přednošk Přetrjebowarskeje centrale (Verbraucherzentrale), wotnožka Budyšin: „Kedźbu wobšudnik!“ Rěči so wo zjebanju při nakupje pječa drohotnych knihow

17 hodź. wospjetowanje přednoška Serbskeho muzeja w němskej rěči

Na Dnju pomnika njedźelu, dnja 10. septembra je w Serbskim muzeju zastup darmo.

W 15 hodź. budźe kuratorske wjedźenje po wustajeńcy „Čej´da sy?“, w 16 hodź. přizamknje so přednošk Trudle Kuringoweje „Serbske křiže a nabožne pomniki“.

Wupadnje!  Dźěłarnička pantomimy  “Čej’ da sy?“ z dźiwadźelnikom Měrkom Brankačkom

Kak zwuraznjamy naše začuća ze swojim ćěłom, z mimiku a gestiku?

přizjewjenje: ticket@sorbisches-museum.de, 03591/2708700

zastup: šulerjo 2 €, studenća 4 €, dorosćeni 7 €

Na dalše kuratorske wjedźenje po wustajeńcy “Čej´da sy?” přeprošuje Serbski muzej njedźelu, dnja 27. awgusta w 15 hodź. w němskej rěči a w 16 hodź. w serbskej rěči.

We wjedźenju staja so prašenje za tym bytostnym serbskeje katolskeje kónčiny w přirunanju ze susodnymi regionami. Što je so w poslednich sto lětach změniło we wosadach, wjeskach a swójbach? Pokazuja a rozłožuja so jónkrótne objekty wustajeńcy.

Serbski institut přeprošuje zhromadnje ze Załožbu Sakske wopomnišća/Wopomnišćo Budyšin a Serbskim muzejom wutrobnje na moderěrowane knižne předstajenje srjedu, dnja 30. awgusta 2023 w Serbskim muzeju:

Awtorka Birgit Sack (Załožba Sakske wopomnišća) předstaji w rozmołwje z Jessicu Bock (Digitalny němski žónski archiw) swoju nowu knihu wo Mari Grólmusec (1896-1944). W njej wopisuje wotměnjawy žiwjenski puć intelektualneje w Němskej 1920tych a 30tych lět. Na zakładźe wobšěrnych rešeršow přirunuje awtorka tež přećiwne posthume stilizowanje Marje Grólmusec ke katolskej martrarce, serbskej patriotce, socialistiskej wojowarce a zakitowarce žónskeje emancipacije kritisce z wobchowanymi žórłami. (Kniha je wušła w Wallsteinowym nakładnistwje.)

Do prezentacije 18:00 hodź. poskića Serbski muzej kuratorske wjedźenje po wosebitej wustajeńcy “Čej’ da sy? Wurzeln im Wandel”.  Knižne předstajenje započina so w 19:00 hodź.

Wo awtorce:

Birgit Sack je historikarka a nawjeduje Wopomnišćo Mnichowske naměsto w Drježdźanach při Załožbje Sakske wopomnišća. K jeje slědźerskim ćežišćam liča spjećowanje a justicielne přesćěhowanje w nacionalsocializmje, žónske a splažne stawizny kaž tež politiski katolicizm we Weimarskej republice. Dr. Birgit Sack je jako PostDoc-stipendiatka w Serbskim instituće (1995-1997) započała z rešeršemi wo žiwjenju Marje Grólmusec a reflektowanju wo tym w regionalnej pomjatnej kulturje. Wot toho časa sem je swoje přepytowanja wobstajnje wudospołniła a wuhódnoćiła. W měrcu 2023 je wobšěrna biografija wo Mari Grólmusec w nakładnistwje Wallstein w Göttingenje wušła.

Wo moderatorce:

Dr. Jessica Bock studowaše srjedźne a nowše stawizny na Lipšćanskej uniwersiće. Ze stipendijom Zwjazkoweje załožby k předźěłanju SED-diktatury promowowaše na temu “Žónske hibanje we wuchodnej Němskej. Zběhnjenje – rewolta – transformacija w Lipsku 1980-2000”. Za swoju disertaciju, kotraž wuńdźe w lěće 2020 w nakładnistwje Mitteldeutscher Verlag, dósta w lěće 2019 disertaciske myto GenderConceptGroup Techniskeje uniwersity w Drježdźanach. Wot 2016 je Jessica Bock wědomostna sobudźěłaćerka při Digitalnym němskim žónskim archiwje. Tuchwilu zdźěłuje w nadawku towarstwa “Weiterdenken – Heinrich Böll Stiftung Sachsen” brošurku wo přetorhnjenju samodruhosće w Sakskej mjez 1945 a 1989/90.

Sobudźěłaćerjo Serbskeho muzeja wjesela so jara nad najnowšim eksponatom. Jedna so wo originalny pućowanski pas k wupućowanju do Texasa w Americe z lěta 1854. 44lětny ratar Jakub Pampel z Noweje Wjeski pola Hućiny měješe wotmysł domiznu wopušćić. Z hišće njeznatych přičin wón tola njewupućowaše, tak zwosta pas w swójbnym wobsydstwje. Dźakujemy so darićelej Theodorej Henselej ze Zubornički wutrobnje za přepodaće derje zdźeržaneho pućowanskeho pasa za našu zběrku. Nětko móže so z rešeršu k objektowym stawiznam započinać, zo bychu so dalše informacije k wosobje a tehdyšim wobstejnosćam namakali. Na foće přepoda swójba Hensel pućowanski pas muzeologoce Iloni Bierlingowej.

 “Sušić, naselić, zawarić. Składowanje w burskim hospodarstwje.”

15 hodź. přednošk: Andrea Pawlikowa

16 hodź.: přednošk wo zežiwjenju, referantka: Silvia Melde wot Přetrjebowarskeho centruma Budyšin

Wotewrjenje pućowaceje wustajeńcy “PRISMA. Žiwjenje při Klóšterskej wodźe” na Klóšterskim a swójbnym swjedźenju w Pančicach-Kukowje składnostnje 775. róčnicy załoženja klóštra Marijina hwězda.

hdy: njedźelu, 18.6.2023 w 15 hodź.