Wot njedźele, 17. měrca prezentuje Serbski muzej jutrownu wustajeńcu a wěnuje so zaso nałožkam a tradicijam Serbow wokoło jutrow. Wosebje wabja dobyćerske kolekcije wubědźowanja 2024 wo najrjeńše serbske jutrowne jejko. Nimo toho spominamy na serbskeho spisowaćela Bena Budarja z inscenaciju “Na křižerjach”. Pod hesłom “kóstku dać” zaběra so wuměłča Karoline Schneider z wuznamom kawrijowych šlinkow za serbsku křižersku tradiciju. Wustajeńca je wot 17. měrca do 5. meje 2024 přistupna.

W 15 hodź. wjedźe kurator Jürgen Maćij po swojej fotowej wustajeńcy “DUCY DOMOJ – UNTERWEGS NACH HAUSE”. Přizamknje so rozmołwa mjez profesorom dr. Berndom Lindnerom, Forum časowych stawiznow Lipsk a Jürgenom Maćijom. Fotografije předleža tež jako přehladka w knihomaj TIEF IM OSTEN (Mitteldeutscher Verlag Halle) a DUCE DOMOJ – UNTERWEGS NACH HAUSE (LND Budyšin).

20.02.2024, 10 hodź.: Wobrazy z mozaika

Chcemy wuknyć, kak hodźa so wšelakobarbne keramiske kamužki k dekoratiwnemu mustrej zestajeć abo kak wuhotuje so wobrazowy motiw. Štóž chce, njech tež wobraz jako mozaik sam moluje. staroba: wot 5 lět, płaćizna: 6 €

22.02.2024, 10 hodź.: DUCY DOMOJ ( fotowa wustajeńca)

Kóždy rady dowolowe dožiwjenja a wosebje rjane motiwy fotografuje. Što pak je fotograf Jürgen Maćij za wažne měł dokumentować, to widźimy we wustajeńcy “Ducy domoj”. Potym paslimy fotowu collagu, pisamy a molujemy wobrazowu stawiznu. wot 6 lět, płaćizna: 5 €

Na předposlednje zarjadowanje wosebiteje wustajeńcy „Ducy domoj“ z fotografijemi Jürgena Maćija přeprošujemy srjedu wječor do Serbskeho muzeja. We 18 hodź. wjedźe Maćij po wustajeńcy a w 19 hodź. sćěhuje přednošk Serbskeho instituta „’Stupju so k tomu a praju sej: Sym nětko tu. Moja legitimacija je fotowy aparat’ – Sektor foto a film w Domje za serbske ludowe wuměłstwo”. Dr. Theresa Jacobsowa a dr. Ines Kellerowa přednošujetej w němskej rěči.

Lebuzer a delnjošleske konteksty: geografija, stawizny a wuměłstwo

Nawodnica Serbskeho muzeja Christina Boguszowa a kurator muzeja Jędrzej Soliński wobdźělitaj so na wědomostnym sympoziju w Zielonej Górje. Jako projektowa nawodnica wustajeńcy „Wšo je krajina. Serbski moler Jan Buk“ budźe Christina Boguszowa serbskeho wuměłca Jana Buka předstajić.
Sympozij, z wobdźělenjom historikarjow a wuměłstwowych historikarjow z Łužicy a Pólskeje kaž tež lubowarjow serbskich temow a časowych swědkow, mjez nimi wuměłcy kotřiž běchu z Janom Bukom spřećeleni, je jara wažny, zo by so spominało na zašłosć a dynamiku načasnych pólsko-serbskich kulturnych kontaktow hraničneje regionje na woběmaj bokomaj Wódry a Łužiskeje Nysy.

Cyłkowne zarjadowanje budźe z dwójnym wotewrjenjom wustajeńcow „Wšo je krajina. Serbski moler Jan Buk“ kaž tež „Hommage à Jan Buk (IV): ÜBERALL – NIRGENDS – DAHEIM “, krónowany.
W dwójnej wustajeńcy pokazane twórby Jana Buka pochadźeja bjezwuwzaćnje z wobsydstwa Serbskeho muzeja. Zarjadowanje je hižo štwórta stacija rjadu wustajeńcow a mjezynarodnych sympozijow.

Njedźelu, 28. januara w 15 hodź. přeprošuje kurator Jürgen Maćij na wjedźenje po fotografiskej wustajeńcy “Ducy domoj”.

Wutrobnje přeprošujemy na swójbne popołdnjo “Ducy domoj”, njedźelu 21. januara w 15 hodź. Chcemy wustajeńcu z fotografijemi Jürgena Maćija interaktiwnje zeznać. Wo čim drje wobrazy rěča? To zhoniće na swójbnym wjedźenju! Małe dopomnjenki kaž na přikład leporelo, nowolětki abo maski za ptači kwas a póstnicy móža so zhotowić. Dorosćenych witamy w času paslenja na kuratorske wjedźenje z Jürgenom Maćijom a Alexandrom Pólkom. Hdyž leži hišće sněh, wubědźujemy so w kulenju sněhoweho muža a sněhoweje žony. Najrjeńši eksemplar mytujemy! Poskićuje so tež přikusk. Tuž wjeselimy so na was!

• 15 hodź. swójbne wjedźenje
•  kreatiwne poskitki w kabineće
• 16.30 hodź. kuratorske wjedźenje z fotografom Jürgenom Maćijom

Dla připowědźeneho hrožaceho njewjedra srjedu, 17.1.2024 zawrěje so Serbski muzej hižo w 16 hodź. Prosymy wo zrozumjenje.

15 hodź.: přednošk Serbskeho muzeja “Zastaranje chorych a starych na kraju”

Nimo znatych domjacych srědkow hospozow starachu so něhdy baby, zelerki a pomocne organizacije wo zakładne medicinske zastaranje na kraju. Kak je so wobchad ze starymi a chorymi přeměniło a kak je so strowotnistwo w běhu časa wuwiło, so w přednošku wobswětli.

16 hodź.: přednošk Přetrjebowarskeje centrale (Verbraucherzentrale), wotnožka Budyšin. Jens Passlack rěči wo aktualnym stawje zastaranju chorych a k strowotniskemu škitej dźensa.

17 hodź.: “Zastaranje chorych a starych na kraju” wospjetowanje přednoška w němskej rěči

Na literarno-hudźbny wječor přeprošuje Jürgen Maćij zhromadnje ze Serbskim muzejom pjatk, dnja 8. decembra. We 18 hodź. wjedźe kurator Alexander Pólk po wustajeńcy “Jürgen Matschie. Ducy domoj. Unterwegs nach Hause. Fotografije 1972-2022” w serbskej rěči. Přizamknje so w 19 hodź. literarno-hudźbny wječor na žurli. Měrana Cušcyna, Měrka Mětowa a Róža Domašcyna čitaja teksty z knihow Jürgena Maćija. Hudźbnje wobrubi program Jakub Čornak alias “Jacke Schwarz”. Zarjadowanje je w serbskej rěči, při prašenjach kontaktujće nas pod 03591 270 870 0 abo ticket@sorbisches-museum.de.

Měrka Mětowa, Róža Domašcyna a Měrana Cušcyna. foto: Jürgen Maćij